चितवन, असार १३ –
नेपाली कांग्रेसका सभापति तथा पूर्व प्रधानमन्त्री शेरबहादुर देउवाले फरक पार्टी भएकाले कतिपय निर्णयहरूमा छलफल हुनु सामान्य कुरा भएको बताउनुभएको छ ।
आज भरतपुर विमानस्थलमा सञ्चारकर्मीहरूसँग कुरा गर्दै देउवाले कांग्रेस र एमाले दुई भिन्न पार्टी भएकाले निर्णयहरूमा सामान्य असमझदारी हुनु ठूलो विषय नबनाउन आग्रह गर्नुभयो ।
आगामी आर्थिक वर्षको बजेट पारित गर्ने सन्दर्भमा उहाँले भन्नुभयो, “एउटा सामान्य कुरा थियो ‘टेक एन्ड पे’, त्यो हटाएपछि त भइहाल्यो नि, ठूलो कुरा थिएन ।” उहाँका अनुसार कांग्रेसको आग्रहपछि सरकारले बजेटबाट विद्युत् खरिद सम्झौता अन्तर्गतको ‘टेक एन्ड पे’ व्यवस्था हटाएको हो ।
नेपाली कांग्रेसको महाधिवेशन कहिले हुन्छ भन्ने प्रश्नमा सभापति देउवाले कांग्रेसको विधानअनुसार नै समयमा महाधिवेशन हुने स्पष्ट पार्नुभयो । त्यसैगरी, भिजिट भिसा प्रकरणमा गृहमन्त्री दोषी नरहेको दाबी गर्दै उहाँले भन्नुभयो, “कहाँबाट गृहमन्त्री दोषी हुन्छन् र? यो त झुटा आरोप हो ।”
सभापति देउवा, शशांक कोइराला, विमलेन्द्र निधि, कोषाध्यक्ष उमेश श्रेष्ठलगायत नेताहरू आज नेपाली कांग्रेसकी नेतृ तथा प्रजातन्त्र सेनानी गौरीदेवी प्रधानको श्रद्धाञ्जली सभामा सहभागी हुन चितवन आउनुभएको हो।
