भरतपुर ०८ बैशाख । जनता समाजवादी पार्टी (जसपा)ले भरतपुर महानगरपालिका भित्रका २९ वटै वडाको वडाअध्यक्षको टुंगो लगाएको छ ।
बिहीबार भरतपुरमा पत्रकार सम्मेलन गरेर पार्टीको तर्फबाट महानगरका सबै वडामा उमेदवार टुंगो लागेको बताएको हो । पाँच दलीय गठबन्धनबाट भागबण्डामा कति वडा पर्ने भन्ने विषयमा भने टुंगो लागेको छैन् । जसपाको भरतपुर महानगर अध्यक्ष अनुज जोशीका अनुसार जसपाले गठबन्धन भित्र महानगर भित्रको वडा नं. १, २, ११ र १६ मा वडाअध्यक्ष पाउनुपर्ने माग दाबी गरिरहेको छ ।
‘हामीले हाम्रो मुख्य आधार क्षेत्र भएकै ठाउँमा माग गरिरहेका छौँ,’ उनले भने, ‘तर, छलफल जारी रहेकोले कति वटा वडा पाउने भन्ने विषय टुंगो लागेको छैन । तर, गठबन्धन दलले नेपाली कांग्रेस, माओवादी केन्द्र र नेकपा एकीकृत समाजवादी पार्टी भित्र मात्रै छलफल चलाएको जसपा चितवनका अध्यक्ष प्रेम भुजेलले बताए ।
‘हामी पनि गठबन्धनमा भएपछि हामीलाई पनि छलफलमा समेट्नुपर्छ भन्ने हाम्रो माग हो,’ उनले भने, ‘तर, यहाँ तीन दलीय गठबन्धन जस्तो गरेर छलफल चलाएको छ भन्ने सुन्नमा आएको छ ।’ गठबन्धनले जसपालाई वास्ता नगरे सबै पालिकामा सबै पदमा उमेदावरी उभ्याउने उनले बताए ।
गठबन्धनले सबै दललाई सम्मानजनक व्यवहार गरेर भागबण्डा मिलाउनुपर्ने उनको भनाइ छ । ‘हामीलाई पनि हाम्रो पार्टी र संगठनअनुसार सम्मानजनक स्थान चाहिन्छ,’ उनले भने, ‘त्यसभन्दा बाहिर गएमा हामी जतिसुकै सानो दल भए पनि सबै स्थानमा हाम्रो उमेदावरी रहन्छ ।’
