विराटनगरः सुनसरीमा प्रहरी हवल्दार ओमप्रकाश खतिवडाले आफैंमाथि गोली हानेका छन् । उनको उपचारका क्रममा मृत्यु भएको छ ।
जिल्ला अदालत सुनसरीका न्यायाधीश शंकरबहादुर राईको सुरक्षामा खटिएका नेपाल प्रहरी हवल्दार ३५ वर्षका खतिवडाले जिल्ला अदालत सुरसरी परिसरमै आफ्नो कञ्चटमा गोली हानेका हुन् ।
सोमबार साझ करिब साढे ७ बजे अदालतको छतमा आफैंलाई गोली हानेका खतिवडालाई उपचारका लागि विपी कोइराला स्वास्थ्य विज्ञान प्रतिष्ठान धरान पठाइएको थियो ।
राति करिब ९ बजे खतिवडाको मृत्यु भएको जिल्ला प्रहरी कार्यालय सुनसरीका प्रहरी उपरीक्षक कमल थापाले जानकारी दिनुभयो ।
उनले आफूलाई गोली हान्नुको कारण खोजिरहेको थापाले बताउनुभयो । खतिवडा घर बिदाबाट केही दिन अघि मात्र काममा फर्किएका थिए । उनको घर मोरङको उर्लाबारीको दुर्गापुरीमा पर्छ । अस्पतालबाट परिवारले शव बुझेर लगेको प्रहरी उपरीक्षक थापाले बताउनुभयो ।
