चितवनः रत्ननगर नगरपालिका वडा नम्बर १० टिकौलीमा आज विहान तीनवटा सवारी साधन एक आपसमा ठक्कर खाँदा तीन जना घाईते भएका छन् । जिल्ला प्रहरी कार्यालय चितवनले दिएको जानकारी अनुसार घाईते हुनेमा रत्ननगर नगरपालिका वडा नम्बर ८ का २२ वर्षिय अजित चौधरी, रत्ननगर नगरपालिका वडा नम्बर १ का २० वर्षिय सुरज चौधरी र पर्शाको श्रीपुर वस्ने १९ वर्षिय रामजी शाह रहनु भएको छ ।
भरतपुरबाट टाँडी तर्फ जाँदै गरेको ना २ प ३८५ नम्बरको मोटरसाईकल र टाँडीबाट भरतपुर तर्फ आउँदै गरेको ना ६५ प ६०८९ नम्बरको मोटरसाईकल एक आपसमा ठक्कर खाने क्रममा टाँडीबाट भरतपुर तर्फ आउँदै गरेको ना ८ ख १९९१ नम्बरको ट्रकमा ठक्कर खाएको थियो ।
ठक्करबाट ६०८९ नम्बरको मोटरसाईकलका चालक र सवार चौधरी र ३८५ नम्बरको मोटरसाईकलका चालक शाह घाईते हुनु भएको छ । शाहको चितवन मेडीकल कलेजमा उपचार भईरहेको छ भने चौधरी द्धयको पुरानो मेडीकल कलेजमा उपचार भईरहेको छ । उपचार भईरहेका मध्ये सुरज चौधरीको अबस्था गम्भिर रहेको छ भने अन्यको मध्येम रहेको प्रहरीले जनाएको छ ।
