चितवनः आन्तरिक राजश्व कार्यालय भरतपुरले गत आर्थिक वर्षमा रु २६ अर्ब ८३ करोड ५ लाख राजश्व संकलन गरेको छ । अघिल्लो आर्थिक वर्षको तुलनामा रु १ अर्ब ७४ करोड बढी राजश्व संकलन भएको हो ।
कार्यालयले अघिल्लो आर्थिक वर्षमा रु २५ अर्ब ९ करोड ७ लाख राजश्व संकलन गरेको थियो । गत वर्ष राजश्व वढे पनि लक्ष्य भने पुग्न सकेको छैन । कार्यालयका प्रमुख पुण्यबिक्रम खड्काका अनुसार गत वर्ष आन्तरिक राजश्व बिभागले रु ३१ अर्ब ५ करोड लक्ष्य दिएको थियो । अघिल्लो आर्थिक वर्षमा लक्ष्य रु २६ अर्ब ६० करोड रहेको थियो । गत वर्ष यहाँको एउटा मदिरा उद्योग वन्द हुँदा ठूलो राजश्व गुमेको छ । सो उद्योगले अघिल्लो आर्थिक वर्षमा रु १ अर्ब राजश्व भूक्तानी गरेको थियो ।
खड्काका अनुसार गत वर्ष मदिरा जन्य बस्तुको अन्त शुल्क नवढेको, कतिपय प्लाष्टिकका बोटल लगाएतमा अन्तशुल्क हटेको, बढी अन्तशुल्क तिर्ने कोकाकोलाको खपत घटेको लगाएतका कारणले राजश्वको लक्ष्यमा पुग्न नसकेको हो । त्यसै गरी पूर्ण कर परिक्षणका बिषयमा सरकारले नरम नीति लिएर भाद्र २३ अघि पत्र जारी भएका र चार वर्ष म्याद पुगेकाको मात्र परिक्षण गरिएको उहाँले जानकारी दिनुभयो । अन्यको हकमा हालका लागि स्थगित गरिएको थियो । हरेक वर्ष कर छुट पाइन्छ भन्ने मानसिकताका कारण पनि समयमा वक्यौता नतिर्दा राजश्व संकलनमा कमी भएको उहाँले बताउनुभयो ।
कार्यालयले अग्रिम कर कट्टि ४९ वटा करदाताको गरेको, १९७ वटा वजार अनुगमन गरेको, २४ वटा करदाता शिक्षा कार्यक्रम गरेको थियो । करदाता शिक्षाले मूल्य अभिबृद्धि कर तर्फ रु ५६ करोड ५० लाख बक्यौता संकलन भएको थियो । जुन लक्ष्यको १९८ प्रतिशत हो । आयकर भने रु ५ करोड ४१ लाख मात्र संकलन भयो । यो १३ प्रतिशत मात्र हो । रु ४१ करोड बक्यौता आयात करमा उठाउने लक्ष्य कार्यालयको थियो । रु २१ करोड ४५ लाख बेरुजु फच्छ्योट गरिएको उहाँले जानकारी दिनुभयो । कार्यालयमा हाल ७४ हजार करदाता रहेका छन् ।
कार्यालय बाहेक जिल्लाका ६ पालिकामा पनि करदाता सेवा दिने गरिएको छ । भरतपुर महानगरपालिका बाहेकका पालिकाहरुले पान नम्बर बितरण, बिबरण संसोधन, दर्ता खारेजी निवेदन, मूल्य अभिबृद्धि करको निवेदन दता लगाएतका राजश्व संकलन संग सम्बन्धित काम गर्दछन् ।
