चितवनः सामाजिक तथा राजनीतिक व्यक्तित्व मैयादेवी श्रेष्ठलाई लोकतान्त्रिक योद्धा सम्मान प्रदान गरिएको छ । प्रजातान्त्रिक विचार समाज केन्द्रीय समितिले आज उहाँलाई सम्मान गरेको हो ।

केन्द्रीय अध्यक्ष डा. केदारनरसिंह केसीको नेतृत्वमा यहाँ आएको केन्द्रीय पदाधिकारी, जिल्ला समिति, नेपाली कांग्रेस चितवनका सभापति सहितको उपस्थितिमा उहाँकै निवासमा सम्मान गरिएको हो । शारीरिक अस्वस्थताका कारण ९४ वर्षिया श्रेष्ठलाई समाजले निवासमै सम्मान गरेको हो ।

श्रेष्ठलाई सम्मान गर्दै केसीले सामाजिक र राजनीतिक क्षेत्रमा उहाँको योगदानको चर्चा गर्नुभएको थियो । युवादेखि अहिलेसम्म उहाँ पार्टी र समाजमा पु¥याएको योगदान अहिलेको पुस्ताले भुल्न नहुनेमा उहाँले जोड दिनुभयो । उहाँले भन्नुभयो “अहिले उहाँले चाहेर पनि सक्नुहुन्न, सक्ने समयमा हामीले समाजलाई जे सक्छौं, त्यो दिनुपर्छ ।”

समाजका बरिष्ठ उपाध्यक्ष कुलचन्द्र वाग्लेले पार्टीदेखि पत्रकारसम्म श्रेष्ठले पु¥याएको सहयोगको चर्चा गर्नुभयो । नेपाली कांग्रेस चितवनका सभापति राजेश्वर खनालले बोल्न सक्ने अवस्थासम्म श्रेष्ठले जहिले भेट्दा पनि नयाँ र उर्जाशील कुरा भन्ने गरेको बताउनुभयो ।

सो अवसरमा श्रेष्ठको रेखदेख गर्दै आउनु भएका छोरा टंकनाथ पौडेलले आमाले नेपाली कांग्रेस नै आफ्नो सिंदुर भएको बताउँदै आजीवन अविवाहित रहेको बताउनुभयो । हालसम्म विभिन्न सामाजिक संघ संस्थालाई अहिले बजार मूल्य हेर्दा रु. १ अर्ब भन्दा बढी भौतिक सम्पत्ति दान गरिसकेको उहाँले जानकारी दिनुभयो ।

सो अवसरमा समाजका केन्द्रीय उपाध्यक्ष डा. ईश्वरीप्रसाद लौडारी, महासचिव गोकर्ण अर्याल, समाजका बागमती प्रदेश संयोजक भरतप्रसाद दवाडी, लुम्बिनी प्रदेश संयोजक शंकर विवस मजगैया, समाजका जिल्ला अध्यक्ष डा.देवीप्रसाद कँडेललगायतले श्रेष्ठको योगदानको बारेमा चर्चा गर्नुभएको थियो ।

श्रेष्ठलाई समाजले सम्मानसँगै दिएको नगद रु.२५ हजारमा थप गरी रु. १ लाख ११ हजार १११ समाजको जिल्ला समितिलाई छोरा पौडेलले अक्षयकोष स्थापनाका लागि उपलब्ध गराउनु भएको थियो । केन्द्रीय समितिले २०७७ को सम्मान श्रेष्ठलाई अर्पण गरेको हो ।

२०६७ को नुतन थपलिया, २०७५ को पुरुषोत्तम बस्नेत, २०७४ को चक्रप्रसाद बाँस्तोला, २०७३ को इन्द्रकान्त मिश्र र २०७२ को कुलबहादुर गुरुङलाई प्रदान गरेको थियो । श्रेष्ठले नेपाली कांग्रेस केन्द्रीय कार्यालय, जिल्ला कार्यालय, वडा कार्यालयका लागि भवन बनाउन जग्गा उपलब्ध गराउनु भएको छ । यसैगरी नेपाल प्रेस युनियन चितवन शाखा सहित विभिन्न संघ संस्था र व्यक्तिलाई जग्गा दान गर्नुभएको छ । उहाँकै नामबाट भरतपुरमा सुश्री मैयादेवी कन्या कलेज संचालनमा छ ।

प्रतिक्रिया दिनुहोस !