काठमाडौः नेपाली कांग्रेसका सभापति शेरबहादुर देउवाले केही गरेन भनेर विरोध गर्नेहरूले नै अहिले कांग्रेसलाई खोजिरहेको बताउनुभएको छ ।
कांग्रेसले केही गर्दैन भनेर विरोध गरिरहेकाहरू अहिले कांग्रेसलाई खोज्न थालेको देउवाले बताउनुभयो । कांग्रेसबाट केही आशा गर्नु राम्रो पक्ष भएको देउवाको भनाइ छ।
महेन्द्रनारायण निधिको ९९ औं जन्मजयन्तीका अवसरमा काठमाडौंमा बुधबार भएको विचार गोष्ठीमा देउवाले भन्नुभयो “भोट दिने बेला कांग्रेसलाई नदिने अहिले कांग्रेस चाहियो?”
प्रतिनिधि सभामा कांग्रेसको ६३ सांसद छन्। उहाँले मानिसहरूले कांग्रेसलाई खोजिरहेको पनि बताउनुभयो। जनता, वुद्धिजीविहरू र पत्रकारले कांग्रेस कता छ भनेर खोजेकोले उहाँले धन्यबाद समेत दिनुभयो।
उहाँले नेकपाभित्र दुइटा समूह देखिएको तर पार्टी कानुनी रूपमा एक नै रहेको बताउनुभयो। “उहाँहरूका बीचमा झगडा भयो। अहिले दुइटा समूह छ। पार्टी एकै छ। हामी कुनै पार्टी फुटोस् भन्ने चाहना पनि छैन,” उहाँले भन्नुभयो ।
सर्वोच्चले प्रतिनिधि सभा विघटनबारे अन्तरिम आदेश नदिएकोले आफूले पुनर्स्थापना र चुनाव दुबै जे भए पनि स्वीकार गर्छौं भनेको देउवाको भनाइ छ।
“सर्वोच्चले स्टे अडर देला भनेको दिएन। त्यसपछि के होला के होला भन्ने लाग्यो मलाई। शंका थियो। त्यही भएर मैले पुनर्स्थापना र चुनाव जे भए पनि स्वीकार गर्ने बताएको हुँ,” उहाँको भनाई थियो ।
