मेलबर्न, अष्ट्रेलिया: चितवन समाज भिक्टोरिया, अष्ट्रेलियाको साधारण सभा तथा अधिवेशन सम्पन्न भएको छ । अधिवेशनले अनुपम पाठकको नेतृत्वमा १७ सदस्यीय नयाँ कार्यसमिति चयन गरेको छ ।
नेपालको चितवन जिल्ला घर भई अष्ट्रेलियाको भिक्टोरियामा बसोबास गर्नेहरुको संस्था चितवन समाजको अधिवेशनले सर्वसम्मत समिति चयन गरेको हो । समितिको उपाध्यक्षमा विपुल ज्ञवाली, सचिवमा गोविन्द पाठक, कोषाध्यक्षमा राजेन्द्र उप्रेती, सहसचिवमा कमल लामिछाने र सहकोषाध्यक्षमा सोभित प्रधान चयन हुनु भएको छ ।
कार्यसमिति सदस्यहरुमा सुमन अधिकारी, बबिन मिश्र, प्रकाश आचार्य, एसके गौतम, सैवाल न्यौपाने, दिक्षा रिजाल, हरि सापकोटा, शिशिर बस्ताकोटी, फणिन्द्र अधिकारी, कृष्णहरि पौडेल र कस्तुरी शर्मा रहनु भएको छ । भिक्टोरियाको नेपाली समुदायका अगुवा सोम गुरुङ र सुरेश पोखरेल सम्मिलित निर्वाचन समिति बनाइएको थियो ।
कार्यक्रमका उद्घाटन सत्रमा अध्यक्ष आत्माराम रिजालले आफ्नो कार्यसमितमा रही कार्य गर्ने र सहयोग गर्ने सबैलाई धन्यवाद दिनुभएको थियो भने सचिव र कोषाध्यक्षको प्रतिवेदन प्रस्तुत गरी पारित गरिएको थियो । कार्यक्रममा उपस्थित एनआरएन अष्ट्रेलियाका अध्यक्ष एवं चितवन समाजका सल्लाहकार केशव कँडेल, नेप्लीज एशोसिएसन अफ भिक्टोरियाका अध्यक्ष राम गुरुङ, एनआरएन भिक्टोरियाका संयोजक प्रेमप्रसाद कँडेल, सुरेश पोखरेल, सोम गुरुङलगायतले अधिवेशन सफलताको शुभकामना दिनुभएको थियो । चितवन समाज भिक्टोरियाले आफ्ना सदस्य र नेपाली समूदायलाई जोड्न विभिन्न कार्यक्रमहरु गर्दै आएको छ भने नेपालमा विभिन्न परोपकारी कार्यहरु गरिरहेको छ ।
यसअघि नै सम्पन्न हुनुपर्ने साधारणसभा कोरोना भाईरस (कोभिड १९) संक्रमणका कारणले शनिबार मात्रै सम्पन्न भएको हो। भिक्टोरियामा कोरोना संक्रमण ३६ दिनदेखि शुन्यको अवस्थामा छ भने ईन्डोर कार्यक्रमस्थलमा ५० जनासम्म भेला हुन पाउने व्यवस्था रहेको छ । विदेशी भूमिमा रहेर पनि आफ्नो जन्मभूमिप्रतिको मायाले नेपाल र विशेषगरी चितवनमा परोपकारी कार्य गर्न चितवनबाट त्यहाँ पुगेकाहरु संगठित भएका हुन् ।
