चितवनः जिल्लामा पछिल्लो समयमा सरदर दैनिक १४ जनामा कोरोना संक्रमित थपिन थालेका छन् । यही साउन २१ गते देखि आज सम्म जिल्लामा २ सय ६९ जनामा कोरोना संक्रमण पुष्टि भएको छ । यसलाई हेर्दा दैनिक सरदर १४ पर्न आउँदछ । अहिले सम्म संक्रमितको संख्या ३ सय ८५ पुगेको छ ।
भरतपुर अस्पतालका सूचना अधिकारी लिलाधर पौडेलका अनुसार साउन ९ गते सम्म जिल्लामा १ सय १६ जनामा संक्रमण देखिएको थियो । साउन १० गते देखि २१ गते सम्म यहाँ संक्रमण देखिएको थिएन । पछिल्लो २० दिनको समयमा कोरोना संक्रमण दर निकै वढेको पौडेल बताउनुहुन्छ । जिल्ला प्रशासन कार्यालय चितवनले दिएको जानकारी अनुसार संक्रमित मध्ये १ सय २६ जना कोरोना निको भई सकेको छ । १ सय ७६ जनामा कोरोना रोगको लक्ष्यण देखिएको थिएन । जिल्लामा भेटिएका संक्रमित मध्ये ६३ जनामा मात्र लक्ष्यण देखा परेको छ ।
हाल सक्रिय संक्रमित २ सय ५४ जना रहेका छन् । उनीहरु मध्ये १८ जनाको सघन उपचार कक्षमा उपचार भईरहेको प्रशासनले जनाएको छ । उचित तरिकाले मास्क लगाउने, भिडभाड नगर्ने, व्यक्ति व्यक्तिबीच दुरी कायम गर्ने, केही छोए पछि साबुन पानी वा स्यानीटाइजरले राम्रोसँग हात धोए कोरोनाबाट जोगिन सकिने प्रशासनले जनाएको छ ।
प्रमुख जिल्ला अधिकारी नारायण प्रसाद भट्टराई संक्रमित र अन्य सबै बिरामीहरुले सहज उपचार पाउने व्यवस्था मिलाउनका लागि सरकारी र निजी क्षेत्रका अस्पतालहरुको बिचमा समन्वय गर्न संयन्त्र निर्माण भई काम सुरु गरिसकीएको बताउनुहुन्छ । लक्ष्यण नदेखिएका संक्रमितहरुलाई स्थानीय तहको आईसोलेसनमा राख्ने व्यवस्था मिलाईएको छ । उहाँले भन्नुभयो “संक्रमण रोकथामका लागि स्थानीय तह, वडा तथा टोल सुधार समितिको क्रियाशिलता अझै बढि आबश्यक छ ।”
भरतपुर अस्पतालको कोभिड १९ प्रयोगशाला र चितवन मेडिकल कलेजको प्रयोगशालामा कोरोना परीक्षण हुँदै आएको छ । संकलित स्वाब मध्ये १५ देखि २० प्रतिशतमा कोरोना देखिने गरेको उहाँले बताउनुभयो । कोरोना नियन्त्रणका लागि जिल्लामा हाल निषेधाज्ञा जारी गरिएको छ । भदौ १२ गते राती १२ वजे सम्मका लागि स्थानीय प्रशासनले निषेधाज्ञा जारी गरेको हो ।
“निषेधाज्ञाका क्रममा आबश्यक सामाग्री खरिदका लागि छुट्याईएको समयमा मानिसहरुको अस्वभाबिक भिडले अझ जटिलता थपेको छ” उहाँले भन्नुभयो । सुरुवाती समयमा बाहिरबाट आएका बिरामी र कामदार, सार्वजनिक सवारी साधनमा यात्रा गर्ने व्यक्ति उच्च जोखिम समूहमा राखिएको भए पनि अहिले कतै यात्रा नगरेका व्यक्तिहरुमा संक्रमण देखिनुले जोखिम समूह एकिन गर्न कठिन भएको उहाँले बताउनुभयो ।
कोरोनाको जोखिम न्युनिकरणका लागि निषेधाज्ञा गरिए पनि यो दिर्घकालिन समाधान नभएको भन्दै यसको दिर्घकालिन समाधानका लागि नागरिकको व्यवहारमा परिवर्तन आउन जरुरी रहेको भट्टराईको भनाई छ । निषेधाज्ञा तत्कालिन समाधान नभएको भन्दै उहाँले भन्नुभयो“दिर्घकालिन समाधानका लागि कोरोनाको जोखिम नहुने गरी नागरिकको व्यवहारमा परिवर्तन आउन जरुरी छ ।”
निषेधाज्ञा हेटपछि खुल्ने बैंक तथा वित्तिय संस्था, सरकारी कार्यालय, सपिङ सेन्टर जस्ता भिडभाड हुने क्षेत्रमा स्वास्थ्य मापदण्ड पालना गराउन नसके स्थिती नियन्त्रण बाहिर जानसक्ने भएकाले सबै सचेत हुन समेत प्रशासनले आग्रह गरेको छ ।
