महोत्तरी, : कोभिड–१९ सङ्क्रमण भएको पुष्टि भएपछि महोत्तरीको भङ्गाहा नगरपालिका–४ रामनगरकी करीब ८० वर्षीया रुक्मिणी भुजेललाई औषधी उपचार कसले गरिदेला भन्ने चिन्ता परेको छ ।
सम्पत्तिको नाउँमा एउटा पराले झुप्रो मात्र रहेको र परिवारमा रेखदेख गर्ने कोही नभएपछि भुजेललाई महाव्याधि सङ्क्रमण कसरी पार लाउने भन्ने चिन्ता बढेको हो । “बाबु, खै मलाई त कोरोना भएकोे छ रे” शनिबार परीक्षणका लागि दिइएको स्वावको नतीजा आज सुनेपछि भुजेलले भन्नुभयो, “अब पानी तताएर दिने पनि घरमा कोही छैनन् ।” आपदका बेला मनकारी छिमेकीले दूध र पानी कहिलेकाहीँ ल्याइदिने गरेका भुजेल बताउनुहुन्छ । उहाँका पतिको पहिले नै मृत्यु भएको थियो भने २० वर्षदेखि बिदेसिएका उहाँका छोराको कुनै पत्तो छैन । घरमा भएको एउटा छोरा पनि अशक्त भएको उहाँ बताउनुहुन्छ ।
गत शनिबार ‘एउटै बस्तीमा १३ को मृत्यु’ शिर्षकको समाचार राससमा आएपछि बस्तीमै स्वास्थ्यकर्मीको टोली पुगेर स्वाव सङ्कलन गरेको थियो । स्वाव परीक्षणबाट भुजेलमा सङ्क्रमण पुष्टि भएको खबर आज पाउनासाथ उहाँमा उपचारबारे छटपटी बढेको हो । जेठ महिना लागेदेखि नै ज्वरो आउने, टाउको दुख्ने , जिउहात कटकटी खाने र सास फेर्न अप्ठ्यारो भएको बताउने भुजेललाई छिमेकीले बस्तीमै पुगेको स्वाव सङ्कलन केन्द्रमा पु¥याएर स्वाव दिन सहयोग गरेका थिए । बस्तीमा गत वैशाख २० यता हालसम्म १४ जनाको मृत्यु भएको छ । पछिल्लोपटक आइतबार एक ६१ वर्षीय पूर्वशिक्षकको मृत्यु भएपछि यो सङ्ख्या १४ पुगेको हो ।
कोभिड–१९ का भनिने लक्षणकै बिरामीको मृत्यु भएपनि एक ५० वर्षीया महिलाबाहेक कसैको स्वाव परीक्षण भएको थिएन । बस्तीमा एकपछि अर्को मर्दै जाने र बिरामी बढ्दै गएपछि त्रास नै बढेको छ । यसैबीच गत शनिबार पहिलो चरणमा स्वाव लिइएका ५० मध्ये २८ जनामा सङ्क्रमण पुष्टि भएको छ । भुजेलजस्तै गरीब परिवारका सदस्य सङ्क्रमण पुष्टि भएका छन् । बस्तीमा अझै बिरामीको सङ्ख्या निकै रहेको र पिसिआर परीक्षण गरिन आवश्यक भएको भङ्गाहा–४ का वडाध्यक्ष अशोककुमार महतो बताउनुहुन्छ । सङ्क्रमण पुष्टि भएकाहरुको खानपान, उपचार र अन्य रेखदेख हुन नसके महाव्याधि भय झनै बढ्ने देखिन्छ ।
“गरिबीले गर्दा औषधि उपचार गर्नसक्ने आर्थिक सामथ्र्य नभएका निकै छन्” महतोले भन्नुभयो, त्यस्ता परिवारमा तत्काल औषधिसहितको राहत पु¥याउन जरुरी छ ।” त्यसैगरी बिरामी भई घरमा रहेका १०० भन्दा बढीको पिसिआर परीक्षणका लागि स्वाव लिनु पर्ने महतो बताउनुहुन्छ । यसैबीच जिल्लाका प्रमुख जिल्ला अधिकारी तीर्थराज भट्टराईले भङ्गाहा–४ रामनगर बस्ती सङ्क्रमणबाट ज्यादै प्रभावित देखिएको हुँदा बाहिरी आवागमन पुरै रोकेर स्वाव सङ्कलन र थप उपचार प्रबन्ध बढाइने बताउनु भएको छ ।
उपलब्ध साधन, स्रोत र जनशक्तिको बढीभन्दा उपयोग गर्दै महाव्याधि नियन्त्रणमा सबै लाग्न पर्ने भट्टराईको भनाइ छ । रामनगरमा अहिले पनि १०० भन्दा बढी कोभिड–१९ लक्षणका बिरामीको पिसिआर परीक्षण बाँकी छ । बस्तीका गरीब परिवारलाई उपचार र राहत प्रबन्धमा जुटिएको वडाध्यक्ष महतोले बताउनुभयो ।
