चितवनः नेपाल पत्रकार महासंघका केन्द्रीय अध्यक्ष गोविन्द आचार्यले सबै मिलेर सञ्चार क्षेत्रमा देखिएका समस्या समाधान गर्नुपर्ने बताउनु भएको छ । नेपाल पत्रकार महासंघ चितवन शाखाले आज यहाँ आयोजना गरेको कोरोनाले मिडिया क्षेत्रमा पारेको प्रभाव बिषयक अन्तरक्रिया कार्यक्रममा बोल्दै उहाँले सरकार, पत्रकार महासंघ, मिडिया सञ्चालक मिलेर समस्या समाधान गर्नुपर्ने बताउनु भएको हो ।
समस्या आएपछि मिडिया सञ्चालकहरुले पत्रकारहरुलाई बेतलवी विदामा राख्ने गरेको भन्दै उहाँले मिडियामा समस्या रहेको बताउनुभयो । अग्रभागमा रहेर काम गर्नुपर्ने पत्रकारले आफै स्वास्थ्य सुरक्षाको साधन किनेर प्रयोग गर्नुपर्ने बाध्यता रहेको उहाँको भनाई थियो ।
श्रमजीवि पत्रकारहरुको हक हितका लागि सम्झौताहिन ढङ्गले काम गर्ने बताउँदै उहाँले भन्नुभयो “श्रमजीविको पक्षमा कुनै सम्झौता हुन सक्दैन ।” नेपालमा पत्रकारिता क्षेत्रमा भएका कानुन कार्यान्वयनमा आउन नसक्दा कोरोना कहरको समयमा पत्रकारिता क्षेत्रमा समस्या आएको उहाँको भनाई थियो । उहाँले भन्नुभयो “कानुनमा भएका कुरा कार्यान्वयनमा आउन नसक्दा अहिले समस्या आएको हो ।” समानुपातिक बिज्ञापन प्रणाली, पत्रकार कल्याण कोषमा बिज्ञापनको १० प्रतिशत रकम राख्ने, लेखन क्षमता अभिबृद्धि गर्ने लगायतका कार्यक्रम गर्ने तयारी भईरहेको अध्यक्ष आचार्यले जानकारी दिनुभयो ।
मिडिया वन्द हुनु जनताको आवाज वन्द हुनु भएको भन्दै उहाँले स्थानीय तहले पनि अहिले सहयोग गर्नुपर्ने बताउनुभयो । स्थानीय तहले शिक्षा र चेतनामूलक सन्देश मिडियाबाट प्रकाशन, प्रसारण गरेर सहयोग गर्नुपर्नेमा उहाँले जोड दिनुभयो ।
नेपालमा मिडिया क्षेत्र अझै व्यवसायिक बन्न नसकेको देखिएको भन्दै उहाँले अब मिडियाले व्यवसायिक वा स्वरोजगार भन्ने स्वयम घोषणा गरेर अघि वढ्नुपर्ने बताउनुभयो ।
देशभरमा ४ सय १० जना पत्रकारलाई कोरोना संक्रमण देखिएको सो अवसरमा उहाँले जानकारी दिनुभयो । जस मध्ये ४ जनाको मृत्यु भई सकेको र ८० जना उपचारका क्रममा रहेका छन् । देशभरी १३ हजार जना नेपाल पत्रकार महासंघको सदस्य रहेका छन् ।
कार्यक्रममा नेपाल पत्रकार महासंघ चितवनका अध्यक्ष राधेश्याम खतिवडाले जिल्लामा १० जना पत्रकारमा कोरोना सङ्क्रमण पुष्टि भएको जानकारी दिनुभयो । जिल्लामा २१ वटा अनलाईन, चारवटा टेलिभिजन, २३ वटा एफएम रेडियो, ६ वटा दैनिक पत्रिका र १६ वटा साप्ताहिक पत्रिका सञ्चालनमा रहेका रहेका छन् ।
सो अवसरमा प्रेस संगठन नेपालका केन्द्रीय सदस्य शालिग्राम नेपाल, नेपाल प्रेस युनियन चितवनका अध्यक्ष अनिल ढकाल, पत्रकार तिलकराम रिमाल, कोमलचन्द्र भगत, रमेश पौडेल, रमेशकुमार पौडेल, राजेश घिमिरे लगायतले अहिलेको अवस्थामा सञ्चार गृह संञ्चालनका लागि समेत कठिन भएको बताउनुभएको थियो ।
महासंघ र प्रेस काउन्सिलले देशभर बिभिन्न जिल्लामा मिडियाको अवस्थाका बारेमा अध्ययन गरेर प्रतिवेदन सरकारलाई बुझाउने सो अवसरमा जानकारी दिईयो ।
