चितवनः केही दिन देखि परेको वर्षासँगै नारायणी नदीमा बाढीको जोखिम बढेको जल तथा मौसम विज्ञान विभागले जनाएको छ।

आज रातिबाट तिनाउ, पश्चिम राप्ती, बबई, नारायणी र कालीगण्डकीमा बहाव उच्च हुने तथा भोलि बिहीबार खतरा आसपास पुग्न सक्ने भएकोले उच्च सतर्कता अपनाउन भनिएको हो । जल तथा मौसम विभागले भनेको छ , ‘सबै प्रदेशका थोरै थोरै स्थानमा भारी वर्षा साथै प्रदेश नं १, प्रदेश नं २, वाग्मती प्रदेश, गण्डकी प्रदेश र प्रदेश नं ५ र कर्णाली प्रदेशका १÷२ स्थानहरुमा धेरै भारी वर्षाको सम्भावना रहेकोले ती स्थानहरुका नदीमा पानीको बहाव बढ्ने, पहाडी क्षेत्रमा पहिरो जाने, सडक तथा हवाई यातायात प्रभावित हुन सक्ने भएकोले आवश्यक सतर्कता अपनाउन हुन अनुरोध छ ।’

त्यस्तै पछिल्लो ६ घण्टा झापाको चन्द्रगढी, इलाम–झापाको सीमा मैनाचुलीलगायत झापाको धेरै स्थानमा ठूलो धेरै पानी परेको र अझै पर्नसक्नेप्रति सचेत गराइएको छ । मेची, निन्दा, बिरिङ, माव–रतुवा, कन्काई नदीमा बाढी आउन सक्ने अनुमान गरिएको छ।

बाढी पूर्वानुमान महाशाखाले ती नदीको तटीय क्षेत्रमा मध्यान्ह १२ बजेसम्म सतर्क रहन अनुरोध गरेको छ। आगामी ३ दिन देशभरका नदीमा बाढी आउनसक्ने भन्दै नदी आसपासका बासिन्दालाई सुरक्षित रहन आग्रह गरिएको छ । नारायणी नदीमा पानीको सतह बढेमा चितवन, नवलपुर र नवलपरासीका विभिन्न तटीय क्षेत्रका बासिन्दाको जनजीवन प्रभावित गर्दछ ।

प्रतिक्रिया दिनुहोस !